[港超] 中佬口水多過浪之 希望有個休息之後可以振作

十二月田猛臣8

20221102_d3c65fb9b7cd9f12507f3DGXhcot6XNs.jpg

20221102_e067c19fc9532c336c5djePu6KvAeJym.jpg

前言/廢話︰
上星期銀牌出局，其實對深水埗嚟講都唔係奇事，畢竟對手係理文，不過輸親次次都四五粒，的確係勁無奈！今個星期返回聯賽，昨客旺角場對手係東方。
雖然話東方今屆少咗外多咗年輕球員，不過始終難船仲有三斤釘，仍然有多名港腳坐陣，深水埗要喺作客環境之下，希望可有分落袋，似乎有啲難......
門票︰
正價80蚊，中佬今次亦都多謝深水埗送張贈券俾我。
比賽過程︰
上半場︰開波之後深水埗感覺比上一場銀牌賽積極返少少，無咁屯重兵在後防，而東方今季明顯減少咗外援之下，一開都唔太急，反而就造就第一腳有威的埋門竟然係來自深水埗，只可惜羅港威在禁區內控唔到個波，失咗一次直接攻門機會。
之後嘅時間東方就憑住較好組織佔據中場，而深水埗被壓之下，搓波都搓得好唔理想，有時甚至自己搓搓吓都出埋界或送咗俾東方。而東方亦無大力攻門，似乎係等待機會，結果機會喺27分鐘就出現，東西左路傳出一個中腰波，呢一腳波有啲蠱惑，喺正深水埗幾個後衛同龍門中間，屠俊翹想出與唔出之間，就俾東方7號孫銘謙殺到快腳篤入。
無奈地又先失一粒，東方繼續攻，再過兩分鐘東方又一腳攻門，好彩今次屠俊翹醒目地托出底線，只可惜過到初一過唔到十五，33分鐘右路斬中，孫銘謙喺屠俊翹出迎之前，撩走個波在底線前射空門，結果又輸多一粒！
深水埗上半場最近榜嘅一個機會，角球開出由助攻嘅史堤芬頂中龍，只可惜個波無力，葉鴻輝輕易接收！
下半場：
喺今季聯賽，東方防守力好強，一球未失，而深水埗的攻力就......所以要追平難度就真係好大吓，唯有盡力做喇！只不過好快東方就搏到個角球，開短出嚟10號揚兩揚，起腳射球世界波右上角死角入網，3:0。
之後戰況好簡單，東方三粒在手唔會狂攻，深水埗想收復失地但又有心無力，去到85分鐘，深水埗終於有一個黃金機會，左邊開出罰球39號鄧子均頂中龍葉鴻輝撲出混戰中入網，只可惜球證表示5號陳靜謙越位在先，又詐糊！但係比起食詐糊，更慘嘅事又發生，呢頭同球證拗緊，東方就打反擊，雖然第一步頂得住只係輸角球，但係過到初一邊唔到十五，東方角球開出，由5號頂入......唉！又4粒！之後嘅又係垃圾時間。
入場人數：611人，雖然呢場波喺交通比較方便的旺角，不過今後有榜首大戰喺將軍澳場，拉走部份球迷唔出奇。
總結：
今日的戰果除咗反映優勝劣敗之外，亦反應到年青球隊一個星期一場波，未有足夠時間去改善之前的問題，今日呢場波可能東方本身心中有數，無出現狂轟濫炸，同上星期理文差不多，是在中場猜到你出錯為止。
今場波上半場失的兩球波都係後防失誤所致，孫銘謙就把握機會入波。另外深水埗在自己半場搓波之時，自己出錯傳出界或交失的比較多。下半失的第四球，亦都係因為自己入球判詐糊之後，被人打反擊失一個角球之後再失波。
希望之後有多一個星期嘅休息時間，可以令深水埗加強喺改善防守方面的問題。
下一場主場聯賽比賽，2023年1月29日15:00，對手係理文......
7/13 つづく......