註冊論壇會員，發現更多精彩
您需要 登錄 才可以下載或查看，沒有賬號？立即注册
×
20221117_d6d9ecfadb786911cba4ZhHmFWGe1tMl.jpg
20221117_2bb9836713306e4d7029Z7CR8SEoiNKT.jpg
前言/廢話︰
連續幾個星期嘅比賽後，深水埗終於迎來今個賽季第一次輪空。其實比起其他國家/地區嘅聯賽，港超比賽密度都係一般，不過問題係今屆深水埗明顯起步比例遲，老實講之前打咗8場波，但狀態同隊形只係同其他球隊第一、二輪相約，再加上本身實力問題，對上幾場場場俾人炒四球以上，咁打落去都唔係路，希望多一個星期休息，有多少少時間俾風車Sir諗吓整體實力唔夠之下，有咩方法同其他隊伍拚一拚！尤其係今個星期嘅對手係同級球隊晉峰，唔會係對傑志、理文、東方呢一類未開波就要輸少當贏，唔係完全無得打！
門票︰
正價80蚊，中佬今次亦都多謝深水埗送張贈券俾我。
上半場︰
開波前公佈出場名單，聽到中佬O晒咀，深水埗竟然出四個前鋒，雖然晉鋒唔係強，不過都未至於可以有前無後咁去對攻！不過開波之後，我就開始明白「風車Sir」攪乜東東，原來佢將隊長羅港威縮落去踢左後衛，而針對正係晉峰危險人士費利普薩，絕對係有針對性的部署，而另外亦將中堅杜國瑜「推上一格」改打防中，亦由之前類似3-5-2的陣式，改返做4-4-2，呢一個改變好快就有效果，首先因為晉峰中場亦唔係好強，開波之後深水埗就踢得比之前壓前咗，8分鐘之時差少少就可以開紀錄，只可惜陳靜謙頂唔中！
之後深水埗罕有咁喺中場爭奪之中同晉峰踢成五五波，而且在有攻勢之下，逼到唔少角球同前場界外球！只可惜陣中比較高大只有杜國瑜同陳靜謙，其他身材都係一般，呢個時間中佬望向後備席，之前在菁英杯有上陣的烏哲里有列後備，既然變陣何不唔徹底啲，乜都試吓！甚至之前中佬彈過佢有勇無謀的簡紹威，都可以試吓，反正坦卡都夠膽擺「麥麥送」踢中鋒！
至於晉峰.....由羅港威去mark費利普薩的確係奇招，而且有效果，費利普薩上半場基本上無運行.....不過晉峰要入波，唔靠費利普薩都可以，只要深水埗「出沖」！果然20分鐘之時，晉峰右路傳中，尾柱位突然走漏咗個10號，就俾佢輕鬆頂入，1:0！
晉峰開咗紀錄之後，反而雙方都有啲膠著，深水埗固然攻力麻麻，而晉峰亦無乜板斧，而且今日羅港威看管之下，費利普薩都無啖好食！踢踢吓又到上半場差不多完場，對於深水埗嚟講，呢幾分鐘係高危時間，因為最少有幾場波就係呢啲時間失波，令到下半處境更加被動！深水埗本來想喺半場前追平，冷不提防晉峰解圍仲打埋反擊，費利普薩在右路截到個波單騎推進，勢必呈單刀之時，蒙古國腳奧恩博力追之下，最後用超技術拉低費利普薩，結果佢就成為港超歷史上第一個攞紅牌的蒙古球員......而不幸中之大幸係晉峰亦都唔能夠憑罰球增加紀錄，半場完維持1:0。
下半場：
雖然上半場完場前終於無失波，不過奧恩博紅牌打少一件，對深水埗嚟講的確「責使」，不過我亦見過打少一個反cup對手，所以機會唔係完全無，當然難度都好高。
打多一人之下，晉峰就搶返個中場，之後攻勢比上半場入肉，最佳機會係52分鐘之時，費利普薩面對空門局然打飛機！不過去到60分鐘，晉峰一個角球攻勢，本來唔似太有威脅嘅一腳，居然大漏慢流尾柱，俾前愉園後衛葉卓文剷入成2:0。
雖然再失多一粒，不過深水埗仍然唔放棄，後備入場的尼高拉斯今場由左後衛踢返佢比較啱位嘅前鋒，仲喺67分鐘，深水埗一個罰球攻勢中頂入成2:1。
只可惜在之後大概20分鐘嘅比賽時間，雙方都無乜好威脅嘅埋門，深水埗最有機會追平係泰亞高喺右邊起腳射門，只可惜角色太窄，俾晉峰的守門救出。
最後晉峰守住一球完場！
入場人數：433人，以星期六下午交通方便的青衣場，算係比較少。
總結︰深水埗今日對晉峰作出針對性部署，從正面嚟睇係有一定效用，費利普薩全場最大貢獻係令到奧恩博做紅牌阿姑，除此之外晉峰首席射手基本失準。而將杜國瑜推上踢防中，加強咗中場的硬度，直接令上半場深水埗控球略為佔優，而下半場即使打少一個，都無俾晉峰撳住嚟打，甚至可以攻入聯賽第一球......
不過從負面嚟睇，今日防守仍然出好大漏洞，失嘅兩球固然唔好講，其實晉峰都有幾個機會可以拉開比分，只不過今日費利普薩失準，而另外幾位年青球員把握力亦唔足，先至無好似對上幾場吞四、五粒完場！
進攻方面雖然終於入咗今季第一球，但係自己把握力仍然唔足，上半場有先開紀錄嘅機會亦把握唔到，齋得個搏命事倍功半！
最後中佬有一個想問的問題，今場深水埗搏得唔少角球，但收效甚微，我個人覺得前線制空權唔夠係一個老問題！但係在制空能力唔夠之下，有位1.91米高的前鋒一直放在後備席不用，為何不放入來搏一搏？
下一場主場聯賽比賽，2023年1月29日15:00，對手係理文......
8/14 つづく...... | 
發表於 2006-11-30 18:11
/3 