[港超] 中佬口水多過浪之 有進步但仍未足夠攞分

十二月田猛臣8

20230318_3fe0829d0b7960ea7a92YrjDLPxMhB5X.jpg

前言/廢話︰話咁快又兩個星期，22~23年度港超又開始進入尾聲，由於季初因為疫情關係，今季不設降班，不過老老實實深水埗嘅成績真唔掂，暫時只係贏過兩場U23，而且兩次都係小勝一粒，真係無乜值得高興！
今年睇咗咁多場比賽，但有兩隊我仲未見過，分別係南區同流浪，咁啱三月兩場主場就對呢兩隊！上星期英菁杯對南區，半場守得唔錯無失波，點知下半場突然崩圍連失五球，到今個星期再對南區，深水埗話要復仇，睇吓點！？
.
門票︰正價80蚊，中佬本身係季票會員，所以今場係包在季票之內。
上半場︰上半場開波今日又有變陣，朱偉鈞後備，陳灝正選。可能由於上星期菁英杯比賽中南區被深水埗半場守和，今日希望可以速戰速決，一開波就壓住半場嚟踢，而深水埗基本上退守半場。不過當大部份人都喺深水埗半場，南區又唔能好易唔去撕破深水埗防線，喺上半奧力斯受嘅壓力唔算太大。去到成22分鐘，南區先有一腳正式射門，而一分鐘之後24號一腳射門就比較有威脅，不過都係越楣而去。29分鐘南區圍住深水埗攻，不過真係好有威脅的射門又欠奉，半場未能攻破深水埗大門。
而深水埗攻勢就更加少，上半場最有威脅係陳灝開波無耐嘅射門，不過未考驗到南區守門員，就被南區後衛解圍。
.
下半場：下半場一開波南區就進攻，立即就搏到一個角球，點知上半場防守死球表現唔錯下，下半場呢次角球就比南區杜馬斯衝頂入網！又一次喺開波後唔夠集中，中佬搖頭上半場嘅努力又沖鹹水海！
落後一球當然就唔可以死守，再開波之後深水埗都嘗試壓返上前，雖然唔係壓返住南區嚟打，不過中場爭奪中同南區都可以打成五五波，去到51分鐘，深水埗先由尼高拉斯遠射一腳中門，守門員撲出，尾柱羅港威執雞又被南區後衛閂出，周家樂再補射又省中人彈出.......唉！兩分鐘後今次輪到陳灝殺入禁區，之可惜起踢又炒中波底高飛。
去到74分鐘，南區終於搵到「燕梳球」，簡嘉亨左路殺入禁區傳中俾無人看管下射入成0:2。輸到第二球，基本上深水埗都係返魂乏術，雖然之後仍然向前搶攻，好似81分鐘劉浩霖都有一腳射門，只可惜都係柱邊而出！
去到補時階段，深水埗仍然壓上前希望破蛋，只可惜南區一個反擊，史提芬彭利拿殺入禁區面對奧力斯，鬥智不鬥力之下，趁奧力斯出迎之時一個挑射入網，南區領先到三球！之後嘅時間都算係垃圾時間，好快球證又吹雞完場。
.
入場人數：626人，本來今日係免費招待深水埗區中小學生，不過入場人數就唔夠上次咁多。
.
總結︰今日嘅比賽結果，其實同之前幾場分別唔大，上半場緊逼得唔錯，但下半場一開波就失波，之後有十分八分鐘冠忠南區後防有些小發夢，俾深水埗入到禁區起腳，但最後又把握唔到！
到俾南區入到第二球，之後雖然深水埗仍努力進攻，不過最後仍然粒果無收！喺聯賽淨返四輪之下，如果希望可以搶分的話，前線把握力真係要大大提升！
.
下一場主場聯賽比賽，2023年3月19日15:00，對手係標準流浪
.
15/17 つづく......