[港超] 中佬口水多過浪之 意想不到的釜底抽薪

十二月田猛臣8

20230407_974c34616b12a78aa374nZahitqQvZsS.jpg

前言/廢話︰上一場聯賽俾標準流浪大炒之下，撞上國際賽休息，今個星期再次出戰菁英杯，不過就要作客大埔，之前兩次對大埔都被人攻入5球，而且大埔上一輪聯賽爆冷「嗒」咗傑志三分，氣勢如虹，希望今次最少喺失球方面可以減少！
.
門票︰正價80蚊，中佬本身係季票會員，由於上場俾流浪大炒之後，除咗剎科戰對東方外，另外三場客場比賽都會送俾會員。
.
上半場︰雙方公佈出陣容，由於係菁英杯關係，深水埗都有好幾名常規正選好似係朱偉鈞、杜國瑜、奧力斯休戰，連後備都無！不過之前好多場聯賽都有輪換，好似近期雖然比較小上陣，但史提芬出場都唔會令人意外，另外捷西斯復出，加上沈云燮兩位外援助陣。
開波之後發現有一個怪現像，雖然大埔係主場，但係深水埗反而有球迷打氣，頭十分鐘大埔方面直頭係乜聲都無！到咗十分鐘過後，大埔先有返啲打氣聲，不過聽得出打氣聲之中主要嘅係來自一班小學生，不難令中佬想到早排大埔足球隊同球迷會出現爭拗，球迷會更發聲明以後嘅比賽入場支持唔打氣！究竟係負責打氣的人員遲到，定係雙方仲未和解，就不得而知！
開波後發覺可能兩隊都無機會出線，都係大家摸索吓，未去到好急，而稍為估唔到嘅係上半第一個黃金機會係嚟自深水埗，8分鐘沈云燮嚟一腳遠射，點知同兩星期前一樣，個波又係中概而出.....阿Sim你係咪無拜神？之後大埔都有返啲攻勢，最有威脅嘅一腳18分鐘之時大埔一輪攻擊，一個遠射本來威脅唔大，點知今日嘅守門員戴廷匡唔知係個波太滑定係唔集中，個波居然彈中心口彈返出嚟，最後大埔再嚟多一腳射中龍，今次戴廷匡就做返場好戲，飛身托走！
之後兩隊可能都係受到場地濕滑影響，雙方都無乜一啲黃金機會，唔覺唔覺又差不多完場，好在今次深水埗無再失波！
.
中場休息︰估唔到今日大埔喺中場休息之時有特別安排，安排咗一支樂隊現場表演，只可惜因為當時仍然有毛毛雨，只可以安排在看台下面演奏，而喺看台上面嘅球迷只係聽到音樂見唔到樂隊。
.
下半場：以往幾場比賽，即使上半場守得唔錯，但係深水埗往往下半場開波無耐就會失守，再加上大埔仲換埋保連奴入嚟......不過今日就真係有意外，開波無耐陳灝喺中場搶甩對方腳下球之後單騎推進，大埔後衛無撲出嚟只係行住，冷不提防陳灝就喺禁區頂前面起腳，個波直飛左邊柱邊而入，深水埗作客意外地喺49分鐘領先！
之後大埔當然要反撲，但有一兩次機會都唔中龍，而更令人意外嘅係喺57分鐘時，深水埗喺一輪攻勢之下，陳灝喺右邊底線出波，省中大埔後衛俾尼高拉斯衝埋去喺狹窄角度射入成0:2！
領先兩球之中，中佬覺得似乎今日有機會贏返一場！不過今年深水埗嘅防守力，都唔係「浪得虛名」，雖然領先兩球但時間尚早，果然5分鐘後深水埗門前一輪混戰都解唔到圍，最後大埔由保連奴門前輕鬆射入追回一球！
上次菁英杯深水埗對大埔，落後兩球之下剛追返一球，轉頭又俾大埔拉開戰果，估唔到今日調轉，65分鐘深水埗打反擊，陳灝傳俾羅港威半單刀之下，射成1:3。之後有十幾分鐘大家係係膠著狀態，正當中佬以為今日可以輕鬆少少贏後一場之時，點知去80分鐘，大埔就憑一個罰球傳中俾23號頂入，又再追返至2:3！
之後大埔當然唔同你客氣，希望可以追平，唔好呢頭贏傑志，兩星期後輸俾深水埗做「羅賓漢」，點知可能大埔有部份球員「求和心切」，31號一次中場搶截過程中，完全要人唔要波一腳踩落去深水埗球員，由於事發地點非常近深水埗後備席，郭Sir同一眾教練團當然「慶過辣雞」跳出嚟指罵件31號，看台上深水埗球迷當然十分親切哋「問候」件31號！最後球證居然只係俾個黃牌！
最後擾攘一輪之後，深水埗終於可以守住以2:3喺菁英杯錄得首勝！
.
入場人數：452人，以一場例行公事比賽，加上今日灰矇矇天氣，都唔算太差。
.
總結︰上一輪大埔贏咗傑志，雖然呢一場係菁英杯中例行公事，不過無諗過深水埗可以呢場波贏波而歸，尤其係「阿沈」又射中楣。至於大埔，我本身唔熟佢陣容，唔知佢算唔算用好多副選，不過加比爾、雷仙奴同保連奴都有落場，應該都唔算讓賽。
可能今日因為場地問題，雙方都出現多次「煽腳」，不過就無因為咁而直接失波......
其實今日場波大家都唔算茅，當然毛手毛腳拉吓衫就一定有，直至到完場前大埔31號鞋底蓄意踩對方球員，就係全場最肉酸一腳！我姑且唔講呢個31號是否想蓄意傷人，不過呢一腳球證唔俾紅牌，深水埗教練團同球迷當然十分不滿，31號呢位小朋友(唔好意思，落場比賽的所有球員中佬都夠資格叫佢哋做小朋友)被場邊人問候多兩句條氣又唔順，開返波一爭波呢件31號又嚟一腳踢唔中人的「穿心腿」，球證又無表示！好在依家係港超，正所謂大家都有頭有面，如果在乙丙組比賽，分分鐘就「全武行」。
睇咗幾屆菁英杯，原意係好，但係事實上又有啲不論不類，如果你想加多啲比賽，你就索性踢多一個循環，如果你想俾多啲機會本地球員出場，你就索性限所有外援球員唔好落場，用返土炮就算，等佢哋多啲出場機會。
例如深水埗，無咗「阿沈」中場搏上搏落會如何？大埔無咗加比爾的後防又會點？呢啲狀況聯賽唔會有機會測試到，點解唔喺菁英杯試下？
.
2022~23球季最後一場主場聯賽比賽，2023年5月7日15:00，對手係東方龍獅
.
17/18 つづく......