中佬口水多過浪之 衝出去睇波，K League初體驗

十二月田猛臣8

20230526_4de088381aa5cecf9ef0lHhXamRPhRSQ.jpg

                               
登錄/註冊後可看大圖

                               
登錄/註冊後可看大圖

20230526_81221ee7a4b6c1834a8cdoSgzEbqx9Uz.jpg

20230526_cbe3d7fec6452c2edbd2tzDrxmD5IVP3.jpg

20230526_15dc502587629041ffdeH8ZpZt2xUAOp.jpg

20230526_7e8da3b936d75970a3f5oCLvrHOTVPrX.jpg

20230526_b34bfa06963fe9c40747yRaJp3jG7qbq.jpg

20230526_5e643caf85565350b9f3CGg7Pz2TWkol.jpg

                               
登錄/註冊後可看大圖

20230526_3c6254ccf7061df9dff4UNBVLDIiH9aT.jpg

前言/廢話︰
嚟首爾行幾日，當然要睇返場足球，不過有啲奇怪首爾可以養得起三隊職業棒球隊，反而足球方面只係得FC首爾一支。更離奇係今季K League 1中，水原市居然有兩隊！咁都無所謂喇！反正就係睇FC首爾嘅主場比賽。
.
門票︰
FC首爾的門票大致分兩個價錢，西看台26000圜，其他位置19000圜，主隊打氣區就係北看台，即係龍門後面，講真如果以睇波角度就唔係太理想，最後中佬買咗東看台。由於同賣飛嘅姐姐仔溝通得都唔係太好，所以都無特別再問就走開，之後喺按照中佬嘅傳統，在外圍圍繞球場行咗一圈，就根據張飛上面指示的入閘位入閘。
今咗閘之後打吓卡，就準備搵返自己個位，點知望吓張飛面，都無寫邊一個區、邊一行同邊個位，當中佬想搵工作人員問之時，結果係搵唔到......真係搵唔到！最後行咗一輪，仍然搵唔到工作人員之後，中佬先意識到其實呢一張飛係咪自由席？如果係自由席，咁就搵個我覺得睇得最清楚嘅位，於是中佬就上咗上一層看台，求其搵個位，反正如果係坐咗人哋個位，自然有人叫我起身！
* 當日我行出地鐵站之時，聽到有人用粵語傾計，原來係一pair 男女朋友/夫妻，著晒FC首爾嘅波衫，都係入場睇呢一場波，去到票務處之時又見到，當佢哋聽到中佬用港式英語同售票員溝通之時，仲問中佬係咪香港人？最後佢哋買咗B區，主隊打氣區，果然夠晒專業！
.
首爾世界盃競技場︰
剛剛好二十年前，年輕嘅中佬同老虎都參觀過呢個球場，當時是跟團，當地導遊非常興奮地講解當時韓國隊點樣強大，打敗意大利同西班牙殺入四強，仲教我哋點樣打氣......作為一位資深球迷，當日亦沒有落注任個比賽，但每當聽到當地導遊如何興奮，中佬一想起對西班牙嘅比賽，心中不其然有一啲鬱悶，當然更加無諗過20年後真係會專程嚟呢度睇波！
.
交通︰今日中佬食完人蔘雞之後，就走咗去漫步清溪川(詳情我留返喺旅遊版講)，見到差唔多時間，就搵附近一個地鐵站，咁啱我行到附近嘅係東廟站，一查之下，原來呢個東廟站就正正同首爾世界盃競技場同一條6號線，即係直去唔需要轉車！
同去大部份球場一樣，坐到咁上下車廂內就會出現FC首爾嘅球迷，去到首爾世界盃競技場站之後，基本上跟住其他人就OK！
.
入場︰入閘前，外圍有好多熟食檔，方便球迷入場前可以醫一醫肚，而入閘後亦都有便利店，似乎係由GS25承包咗所有便利店嘅營業權。
入咗場之後，中佬第一個感覺係場的view很好，同香港大球場一樣，專業足球場的確係唔同，比起大運同寶安，無咗條跑道距離接近好多！但係當中佬上咗上層看台坐低之時，發現原來呢個球場設計上係一個嚴重嘅缺點︰當夏天去到黃昏之時，好天嘅日子太陽就會西斜曬到正正東看台呢一邊，雖然看台上有蓋，但係完成遮唔到西斜嘅陽光！可能FC首爾都知有呢個問題，在東看台嘅上蓋垂低咗幾塊巨型Bannar，雖然可以遮到少少陽光，但係起到作用其實唔大！
就以今日開波時間為1800，基本上中佬係要戴住太陽鏡睇波，到30分鐘過後先可以用返正常眼鏡......其實如果可以的話，今晚場波一係開1400，一係開1900甚至1930，啲球迷就唔駛睇得咁辛苦！
對賽隊伍︰
濟州聯︰開賽前排第三，但中佬對呢一隊波都係「零認識」！
.
FC首爾︰開賽前排第二，但中佬對呢一隊波都係「零認識」！
.
比賽過程︰
上半場︰
由於主場比賽，再加上落行蔚山現代超過十分，FC首爾一開波就採取主動，4分鐘已經有一腳有威脅嘅射門，個波右路傳中16號起腳之時企唔穩，雖然個波碌向濟州聯龍門，但去勢太慢被後防護到守門員接返。
兩分鐘後FC首爾又一次機會，左路斬中16頂返後，7號射門點知省中返16號彈出，相當無運！
而濟州聯第一個有威脅嘅機會係喺12分鐘，來自FC首爾後防出沖，自己禁區內猜猜吓竟然傳咗個波俾濟州聯，7號勁射地波好彩首爾守門員封到位擋出！
睇睇吓波，中佬發現K League有一樣嘢同之前睇嘅聯賽唔同，其實之前睇K League直播之時，都發現點解背後成日都聽到PA系統發出一啲聲音，一般嚟講，PA系統只會喺入球、換人、補時幾長同埋下半場宣佈有幾多人入場時，先會用到PA系統公佈！但原來K League係容許主隊喺場比賽進行中，用PA系統指揮球迷打氣時唱咩歌，同用什麼節拍去打氣！
去到31分鐘，FC首爾16號禁區頂又有機會起腳，只可惜又射得太正，被濟州聯守門員輕鬆接住！一分鐘行FC首爾5號中場搶到個波，傳俾隊友之後再回傳俾5號，起腳射門柱邊出界！之後時間雖然FC首爾仍然主力進攻，但漸漸濟州聯都擺出鐵桶陣，唔輕易出嚟，所以雖然在場上形勢佔勢，但係無幾腳真係可以入球嘅攻勢，而濟州聯就更加唔攻，致力上半場打和，結果佢哋嘅戰略都算係成功，半場打和0:0。
.
下半場︰
下半場開始後FC首爾都係佔咗主導地位，但好可惜面對濟州聯嘅嚴密防守，FC首爾始終攻唔入，正當中佬以為今日會上演一場0:0和局之時，喺78分鐘突然間出現突破，FC首爾久攻不下，反而俾濟州聯搶到個波打反擊，17號右路快放傳中，無人看管嘅9號替濟州聯射人一球領先！
呢個突然而來嘅入球，的確係有啲打窒咗FC首爾條氣，仲令FC首爾球員有啲失失慌，三分鐘後濟州聯又搏到角球，開出到禁區頂，FC首爾防守球員個個用「眼神防守」，俾濟州聯嘅9號頭球攻門，連龍門都投晒降，好彩個波偏咗少少出界唔入，如果輸到兩球真係神仙都難救！
唔通全場主龜縮嘅濟州聯，就咁就偷走三分？結果又唔係！去到83分鐘之時，FC首爾一次攻勢，9號衝入禁區之間，濟州聯守門員接唔到個波彈返出嚟，之後就俾後備入場嘅94嘅攞到個波，佢好冷靜咁帶個波扭過一個後衛射入空門！
濟州聯方面啲球員就慶過辣雞，首先投訴係9號入攝之前已經越位，而守門員去接波之時亦受到9嘅嘅干擾，所以應該判唔入！球証之後都有同VAR房商量呢一球，最後球証判入球有效！呢點中佬都唔意外，首先係所謂嘅「主場雞」，而且今日個球証對一啲埋身碰撞都唔多吹！於是FC首爾終於追成平手！
去到補時階段，FC首爾當然係盡地一煲，組織最後一次攻勢，禁區內濟州聯個守門員打手搥打到唔湯唔水，俾66嘅截到射門，守門員已經失晒位，眼看必入之時，俾濟州聯嘅後衛護空門擋返出嚟！濟州聯今日都真係有啲運，其實之前有幾踢高波吊埋去禁區，呢位守門員係接波定係打手搥之間都表現得慌失失，呢球咁都唔駛輸，註定今日FC首爾要跌兩分！
最後一刻，FC首爾攻唔到俾濟州聯打個反擊，唔通又戲劇性反cup？無......濟州聯都不為已甚，攻攻吓將個波吊咗去邊線，擾攘一輪之後球証吹雞完場！
入場人數：20338人，由於我都係第一次入場睇K League，所以唔知算唔算多人。不過如果以首爾世界盃球場嘅容量，入場人數大概係⅓，星期六黃昏波就肯定唔係熱鬧！
.
主場球迷：
韓國球迷打氣當然係堅，如果講聲浪同持久度，即使當年嘅恆大球迷都唔係嗰一皮，最攪笑仲係開波初段，雖然濟州聯嘅球迷人數唔夠FC首爾，但都做出咗一啲聲浪，不過當FC首爾啲球迷「還拖」之後，主隊球迷明顯係人多勢眾，好快就蓋返過去！
不過K League嘅主隊打氣區係設喺龍門後面，同中超設返中間位唔同，如果以睇波嚟講，當然係喺中間位會比較好，而K League似乎就考慮聲浪氣勢等問題。中佬其實見無工作人員管理，下半場都想加入主隊打氣區，不過最後覺得以睇波角度，都係中間位居高臨下會好啲！
總結︰
如果根據聯賽榜排名，呢一場係一場前列球隊，第二同第三的大戰，雖然打和戰果唔意外，但係成個過程就令中佬有啲失望，濟州聯打防守反擊係可以，但係下半場龜縮得太犀利，完全唔係前列球隊嘅大戰，反而似啲中下游球隊作客強隊之時嘅戰術！雖然尾段曾領先，但係全場計上半場仲有小小攻勢，下半場就係完全龜縮，雖然有小小幸運地由一個反擊開咗紀錄，不過之又縮，結果都係俾首爾追和，補時階段俾首爾個66射空門，好在有後衛擋出唔駛輸，已經係執返身彩！
如果以全場波嘅形勢，FC首爾當然係高些小，但係門前把握力就一定係差，全隊以6號，7號同16號表現比較搶鏡，反而那一個踢足全場嘅9號，對住濟州聯啲鐵桶陣後防，既攻唔到門，又hold唔到個波，表現真係平平。另外全場好多時都係靠一啲外圍射門去進攻，當濟州聯擺鐵桶陣之時，根本做唔到入禁區！曾經嘗試兩翼出波，但係傳中嘅質素相當差，基本上濟州聯防守呢一類波都係無大問題！
如果以前列隊伍嘅大戰嚟講，中佬對雙方表現無疑係有啲失望！難怪得聯賽只係打咗14輪，一半都未有，但榜首嘅蔚山現代已經甩開13分，似乎榜首同之後兩隊水準有一定差距。
最後想講一講球証執法嘅尺度，如果以今日呢場波可以代表K League嘅執法水平，中佬會認為比我之前睇到其他聯賽都鬆好多，現場見好多拉拉扯扯球証都唔理，從後踼跌對手，只要動作唔太大都唔吹！我當初以為係我現場睇慣咗港超同中超，所以睇唔慣K League嘅尺度，但睇返左右隔離其他球迷，佢哋都表現得十分不滿，覺得今日個球証執法水平有啲問題！
.
由於首爾只有FC首爾呢一隊波，所以如果下一次想入場睇K League，而又唔想重覆嚟同一個球場，都要諗一諗可以去邊個場！仁川似乎應該比較近，不過一來一回兩三個鐘都無走雞！當然如果下一次嚟韓國，好大可能係同老虎+馬騮*2，所以好似今次咁睇波法機會唔高！
[ 本帖最後由 十二月田猛臣 於 2023-7-30 16:23 編輯 ]