[港超] 中佬口水多過浪之 新的開始

十二月田猛臣8

20230827_887250ce181714a899f7EOqn1KYyZCVQ.jpg

前言/廢話︰22~23年度港超完結之後，今個夏天都有外出睇波，除咗中超之外，仲有第一次睇K League 1同Singapore Primier League。暑假踏入尾聲，中佬個荷包亦都用得八八九九，都係時間回歸本地足球。
今季中佬同上季一樣，仍然會買深水埗足球隊嘅季票，今季深水埗成人季票主要分為兩種，一種是基本上所有比賽都可以入場嘅全季通行證，可以睇32場波，而港超10場主場賽事就係成人通行證，入會有有禮物送，詳情大家可以去深水埗嘅Facebook專頁睇睇。今季中佬就會買成人通行證，因為睇10場主場，作客同杯賽再睇當時是否得閒，再個別場次入場支持會比較好啲。
今季深水埗各方面都有比較大嘅改動，本地球員有離隊亦有加入唔少新血，外援班底亦都有大幅改動，除奧力斯之外，加入咗一名肯亞前鋒，一名日本中場，兩名泰國青年軍，甚至教練都有改動。雖然整體實力仍然未明，不過中佬都對呢一支半新軍有所祈待！當然我唔會唔合理地希望深水埗入季可以成為爭標份子，不過希望最少積份有兩位數字，而且唔再成為「魚腩」，每一場比賽去到最後都唔好被炒，中佬已經收貨！
.
門票︰正價80蚊，中佬本身係700蚊「成人通行證」季票會員，今季最後主場港超比賽已包在內。由於中佬去季都有會員，所以會方為咗多謝我哋去季支持，今季續會藉有50蚊「電視框」，另外亦有一件去上一季唔同嘅棒球打氣衫。
上半場︰
開波前預計，由於呢一場係開季第一場正式比賽，雙方都需要啲時間去整合，南區會好啲，因為今季雖然換咗新教練，但球員變動無咁大，反而深水埗球員變動就比較大！不過開波之後發現深水埗今場都無一開波就主守，而且都幾夠膽推上去，更令中佬意外嘅係雙方好快已經入局，南區亦唔客氣，2分鐘已經有一個入球機會，肥彭左路出波過咗奧力斯，艾華頂空門俾尼高拉斯護空門救出！
之後深水埗亦都唔客氣，開始有返啲攻勢，而且更令中佬意外嘅係攻勢中唔係得個「猜」字，而係有實際嘅攻門！首先係10分鐘之時柏羅邦射門，守門員飛盡擋到中右柱彈出！呢一球都相當無運！16分鐘時又係柏羅邦「中龍」嘅射門俾南區守門員擋出。
幸運之神眷顧之下嘅南區，終於喺20分鐘憑一個角球，由5號頂入打開紀錄！失呢一球中佬都感到相當無奈，因為呢一類失波去季十分常見，為此今季深水埗已經喺中堅位置增援，點知挪威藉中堅拿亞季前熱身賽拉傷今日未能上陣，如果有佢加強制空權呢一球未必要失！
一不離二，到咗30分鐘之時，南區右路傳中，今次到走甩咗「肥彭」，結果佢近射成0:2。跟住深水埗都大力返撲，34分鐘兩位新外援嘅合作，柏羅邦右邊出波，鄧加力壓對手頂中慮，點知又俾南區守門員撲到再中楣......黑到咁，真係無嘢好講！
之後兩方都無再入波之下，半場完！
.
下半場：
開波後南區雖然領先下唔係太急，但仍然有效地防止深水埗嘅攻勢，反而去到57分鐘之時，南區左路傳中，點知匆忙之中，陳靜謙撞咗個波入網，擺老烏成0:3！輸埋呢一球，在場球迷都知今日攞分機會唔高，不過到咗70分鐘，今場波深水埗球員努力終於有回報，鄧子均左路切入，而南區後衛可能分神睇住鄧加同柏羅邦，慢咗啲埋去拍鄧子均，結果鄧子均不負所託射尾柱入追返一球！雖然仍然落後，但今季第一場已經有入波，無論如何都係值得高興！
餘下時間如果深水埗可以再追多一球，咁場波就會有返高潮，之後兩方都唔保留，只可惜深水埗攻勢都無無功而回，反而去到83分鐘南區一輪功勢之下，張志昊解圍之時有啲「衰孤寒」，唔捨得輸角球，反而解圍到「唔湯唔水」，結果被南區交到艾華腳下射成1:4！
輸返1:4之後，場波嘅大局應該都唔會有咩改變，不單係三球難追，時間唔多嘅問題，而係上年都有困擾深水埗嘅問題就係體能問題，下半場入返1:3之後，基本上南區係控制晒個戰局，深水埗唔再可以好似上半場同南區有來有往。果然之後既時間，南區仲係控球較多之下，全場比賽結束。
.
入場人數：821人，唔知點解我覺得好似唔止呢個數！因為入場之時中佬坐咗主場打氣區，本來諗住開波後叫返老虎同馬騮坐上面，點知望一望上面已經坐滿晒！
.
全場最佳球員︰南區「肥彭」。
.
總結︰雖然今日都係輸波，不過在場大家感覺都係正面，首先進攻方面，今季有新前鋒同中場，整體反擊表現都唔錯，如果唔係今日南區守門員有水準演出，有機會入多兩球。記得上季要去到青衣場先可以入到第一球，今季第一場就己經有入波。
後防方面仍然要改善，下半場失嘅兩球非常無謂，上半場除咗俾南區入面球以外，對方亦有最少兩個黃金機會，如果兩方運氣好啲，分分鐘今場波開個3:6都似！
體能都要改善，70鐘之後南區明顯控制晒個戰局，唔似上半場，雖然都係落後，但最少同南區都可以拉成均勢！
.
下一場主場聯賽比賽：9月3日對均業北區。
.
1/10 つづく......