[港超] 中佬口水多過浪之 悶戰下僅敗

十二月田猛臣8

20240420_168bfe6e9c5f77661d3fECmA4sV4TmKc.jpg

                               
登錄/註冊後可看大圖

                               
登錄/註冊後可看大圖

20240420_9560b7ca711ad9b67777Awx9FgxEIxjG.jpg

前言/廢話︰呢一個星期深水埗就返到主場，踢返一場算係補賽，原本對大埔呢一場波，應該係2月初之時踢，不過因為同港聯對邁亞密國際嘅比賽，所以要改期，於是延到4月中比賽。今場面對嘅對手係今季異軍突起嘅大埔，去到4月中大埔仍然有機會同傑志、理文爭今屆聯賽冠軍，所以實力明顯係喺深水埗之上，今場波深水埗如果想攞分，後防就一定要比上場對北區之時更集中！
.
門票︰正價80蚊，而中佬本身係「成人通行證」季票會員，主場港超比賽已包在內。
上半場︰
開波後兩雙都有啲「賊佬試沙煲」，唔係太急，不過整體似乎係大埔中場比較佔優，短短去到8分鐘場波就有爭議，大埔嘅7號起腳射門，個波就省中深水埗嘅球員解圍......大埔球員就示意手球，到個波降圍之後球証就示意暫停，同VAR房溝通之後，仲要睇片！唔係呀嘛！？又嚟？結果「好嘅唔靈醜嘅靈」，連續三場輸十二碼！
唉！最後希望又要拜託梁興傑，之前兩球一球中楣一球撲到，今次大埔由港腳陳肇鈞操刀......結果神勇嘅梁興傑真係又捉到路撲出！嘩好邪呀！
上半場仲有一段小插曲︰正當VAR喺度複核宋柱浩係唔係有手球之時，深水埗高總監帶咗今日中場休息時嘅表演嘉賓，本地女團KNY嚟到球迷區睇比賽。不過似乎幾位小妹妹都係第一次現場睇港超，似乎唔係好知場上比賽過程！而中佬雖然係一個「過氣毒L」，都掛住同其他波友一齊打氣，都無時間去招呼班小妹妹！而KNY幾位妹妹都好友善，仲有同其他球迷合照！
正當我哋以為咁早大埔就十二碼唔入，一定慶過辣雞，會開行turbo去攻深水埗，點知......之後上半場嘅過程，又唔係太激烈，唔客氣講一句，根本有啲悶！雙方埋門次前少唔在講，有威嘅射門更加少之又少，梁興傑除咗救球十二碼之外，其他時間都只係做一啲危險性唔大嘅接波同打手搥。而對家謝家榮掂波時間更少，上半場深水埗最有威脅一次埋門係35分鐘，隊長顏卓彬「攝」到個靚位頂中龍，可惜個波唔係太勁而且太正，俾謝家榮橫身沒收！
.
半場休息時間︰今日中場係有特別嘉賓表演，本地女團KNY會表現跳舞。
下半場：
開波初段都係維持住上半場嘅形勢，大埔主動，但威脅又唔算好大，贏咗形勢但入唔到波，而深水埗今日亦都無太大反擊空間！當然如果維持0:0，對深水埗就無咩所謂，但對大埔爭聯賽冠軍就會影響好大！
今屆大埔去到4月仍然有機會爭標，其中一個原因係唔少比賽「緊熟」之下，以一球擊敗對手全取三分！今場又係同一狀況，65分鐘之時，大埔95號禁區內截到個波，立即起腳快射，結果射破梁興傑五拍關左下角入網，大埔領先0:1！
落後之下嘅深水埗雖然希望可以追平，但受制於今日演出穩健嘅大埔後防，射正機會都唔多，比較有威脅一次係蘇沙禁區內射斜，不過事後旁証舉旗示意越位！由於都無入波，所以VAR亦都無介入！
之後一段時間深水埗都佔上動，不過都係屬於贏形勢，無實際！點知去到85分鐘之時，又出現爭議事件，正當宋柱浩開上中場助攻之時，同大埔陳肇鈞爭波，我哋喺看台睇到無大動作之下，「少爺仔」突然碌咗喺地表現好痛苦，球証吹停之下「少爺仔」好嬲咁彈地，之後爆鬧宋柱浩，仲出雙手推佢，之後雙方球員當然衝埋嚟拉開！
最近雙方都食一張黃牌，不過由於宋柱浩上半場手球之時已經食咗張黃牌，所以兩黃一紅提早離場！
之後深水埗雖然仍然極友反撲，可能本身已經攻唔破大埔嚴密防守，再加上打少一個之下，可能製造嘅威脅唔多，最後長雞一吹，大埔以一球小勝深水埗，繼續保持爭標希望！
.
入場人數：今日入場人數有402，算係深水埗嘅基本盤，星期日加上天氣又熱，算係咁！
.
全場最佳球員︰大埔射入全場唯一入球嘅雷仙奴。
.
總結︰
對於呢一場波嘅最後結果，真係有啲無奈，其實今日大埔都比想像中有啲失準，要逼和對手都唔係無機會，大埔全場只得兩腳黃金機會，十二碼已經唔入，只可惜都係保唔住一分！最大原因應該係深水埗受制於大埔嚴密嘅防守，全場謝家榮都唔需要左飛右撲。
呢場攞唔到分，剩返落嚟主場嘅對手有東方同理文，搶分機會不高，應該得返兩場作客對晉峰同港會機會攞分！
.
下一場主場聯賽比賽：4月28日，對手係東方。
.
12/14 つづく......
[ 本帖最後由 十二月田猛臣 於 2024-4-20 14:03 編輯 ]