註冊論壇會員，發現更多精彩
您需要 登錄 才可以下載或查看，沒有賬號？立即注册
×
20220904_25c143efc8c7b57e95d6ISIEq4miSugi.jpg
20220904_af28a8cf75239359bca6EWX1nGyV5o8I.jpg
20220904_3dee51af3ca6b87a7a89PY6NN0QEScY0.jpg
前言/廢話︰
封關兩年幾之後，雖然今屆中超開始有返主場賽事，但因為疫情關係，深圳要將個主場搬去海南島，而兩支廣州隊只有廣州城(富力)可以保住越秀山個主場，但係仍然唔可以入場，而且早幾季的球星沙希域，迪比利等已經走晒，所以即使可以開返入場，吸引力亦都大減，更加唔好講今季四支廣東球隊，目前成績最好係梅州客家......再者依家唔可能為睇波而要在兩邊都隔離，為睇波攪到咁真無謂！
唔出得去，就留返睇港超喇！不過如果之前有睇過中佬的「波記」，都知中佬係一個老牌愉園擁躉，19/20球季愉園重上港超之時，主場聯賽都全部有入場支持，只可惜一個疫情，最後落得欠薪同自降，作為老球迷又一次深深體會「老細足球」的無奈...... 睇咗愉園幾十年，你叫我做勝利球迷走去捧其他球隊，中佬又真係唔多做得出，所以上一季出現0入場的狀況。本來今季應該都相同，不過早幾個月香港隊在印度出線亞洲杯多少都令我再有想睇波的熱情，當日在商場的祝捷會中佬都在場，大家不斷大叫 We are Hong Kong之後，都令中佬諗今年係咪要再次入場支持港超？
早前在公佈入季港超十支參賽隊伍之後，有網民亦都呼籲希望大家支持港超，無港超就可能連香港隊都無埋！中佬普通人一個，收入不高，開支亦不少，但託賴地要揀一隊波，買套票嚟支持吓嘅能力都仲叫有，唯一問題係揀邊一隊波呢？
可能好多人會揀傑志、東方、理文呢幾支球隊，但中佬就覺得呢幾支大會，本身有一定支持者，正所謂多一個唔多，少一個唔少，反而中佬傾向買一支規模較細的球會的套票支持吓！咁邊隊呢？
和富大埔︰個主場咁遠.......
冠忠南區︰個主場又係咁遠......
標準流浪︰因為一啲原因，中佬對流浪捧唔落手，詳情唔方便講，只可以講同舊年愉園主場反勝流浪嗰一場波，期間發生咗一啲事有關
U23︰中佬唔知點去理解呢一隊波......
晉峰︰本來都可以支持吓，不過前一季同愉園有幾場打得太燦爛......
港會︰有無套票都成問題，而且基本上佢唔落入細球會呢一個級別！
最後一支.....
主場︰中佬可以步行前往
波衫︰又係綠色
熟悉度︰最少有一位職員及一位球員前一季效力愉園
仲有，原來呢隊波從來都無喺頂級聯賽同愉園比賽過.......
咁最後決定︰中佬今季暫定加入深水埗球迷會，其實作為一個大半世人都住在西九龍一帶的人，今季支持深水埗，唔係理所當然嗎？只係中佬喺港甲/港超年代，已經「燈」死咗愉園兩次，今次改「燈」深水埗，唔知會點！會唔會去到最後一場完場後，一班職球員衝上看台摷邊個係中佬，摷到就打鑊佢呢？
套票︰今季深水埗一位成人會員700蚊，有9場主場的入場門票，另外送一件球迷衫，而有趣嘅係球迷衫就以棒球球衣設計，即係中間開鈕扣。
主隊︰中佬喺好多年前深水埗第一次升上頂級聯賽之時入場睇過一次，當年深水埗只係游咗一年就降班。至於依家呢一隊深水埗，只係認識教練潘文迪同球員屠俊翹。
客隊︰港會，老一輩的球迷叫佢哋做「大枱客」，今年升上港超。其實中佬唔係好知佢哋有無增強實力，因為雖然近幾年在港甲比賽，港會都有唔錯表現，不過同幾年前愉園在港甲大殺四方，一上港超就要護級，就可以知道港超同港甲都有幾大差距，唔知今年有無升降班，唔知港會又會唔會好似傳統繼續做「升降機」？
比賽過程︰
上半場︰
一開波深水埗就主攻，唔夠一分鐘就已經有第一個攻門，正當中佬以為今日會係一場攻(深水埗)防(港會)之時，劇情又出現反轉，因為當企定之後，開始主導形勢嘅係港會，雖然港會球員技術唔算好好，但係拚搏精神搭夠，吓吓同深水埗硬碰，結果在體能同體形佔優之下，漸漸就搶到中場的主導權，而前面就靠前港腳基奧同深水埗後衛硬撼。
不過港會前面把握力亦有限，所以雖然佔主導，但都係好睇唔好食進入拉鋸戰。交著咗一段時間，到22分鐘時就有突破，港會進攻時深水埗禁區內起腳，個波省中深水埗球員隻手，球証毫不猶疑立即吹12碼，最後港會由基奧操刀射入，以1:0領先。
其實呢個狀況並唔出奇，因為深水埗上半場都只係靠一啲零星突擊，希望可以突破港會後防，不過基本上無乜組織，所以無乜威脅，而且上半場打咁耐，見唔到深水埗有邊方面係高過港會。到40分鐘右深水埗就先由91號禁區外遠射，不過又俾有唔錯表現的港會守門員救出，最後半場由港會領先一粒之下完場。
下半場︰
開波之後，港會持住領先一粒，自然就你急佢唔急，而深水埗換咗人之下，雖然搶返個中場，但始終基本功有限，即使對手只係港會都會自己搓搓吓斷纜，至於在中場迫搶，亦都輸多贏少。偶然由8號尼高在左邊突破，但最多都只係搏到角球，實際威脅唔大。
而港會在一球領先之下，亦都要機會再添入球，只可惜24號射門柱邊不入。
兩隊磨吓磨吓，又差不多完場，點知呢個時間又唔照劇本行事！港會後備入替嘅26號，本身出場無耐就攞咗個黃牌，去到補時階段，為咗阻止深水埗反擊，又拉低咗深水埗球員，結果兩黃一紅！最後幾分鐘，深水埗打多個，於是就去盡希望追平，仲連續迫得三個角球，只可惜欠缺高中鋒支援下，幾個角球都無功而還！最後球証長雞一吹！中佬今日不單第一次入場睇港會比賽，仲見證佢哋首勝！
入場人數：下半場公報有940人，算唔錯
全場最佳球員︰港會88號菲杜化，但中佬就會揀7號羅賓士高。比較特別係深水埗賽後自己頒發一個自己隊的最佳球員，而呢一場獲選球員就係屠俊翹
總結：
港會的部署十分聰明，簡單用體力去同深水埗周旋，基本上呢場波深水埗的入球機會唔多，港會機本上係唔會輸。而深水埗整體表現比中佬預期更差，因為今日嘅對手只係港會，如果對手更強一啲，唔好講攞分！入唔入到波都成問題。
下一場主場比賽，9月18日15:00，對手係傑志！
| 
發表於 2006-11-30 21:54
/3 