註冊論壇會員，發現更多精彩
您需要 登錄 才可以下載或查看，沒有賬號？立即注册
×
20241027_4dc354dee93a03275f086NPQvcKnc2Ey.jpg
20241027_ea66081eac7adf0a9c5brq3G5uOrhPeS.jpg
廢話︰不經不覺又有成三個月無睇中超，「北上」成日都有，不過夾唔啱時間睇波，而且港超新球季又開鑼，今季中佬仍然有做「某」隊的季票會員，不過由於我一向黑腳，所以無謂講係邊隊，反正得9隊。
10月20日呢一日有一場中超，深圳新鵬城對梅州客家，焦點係呢兩隊波今季都表現欠佳，兩隊護級形勢都水深火熱，仲好大機會兩隊最少死一隊！本來呢一日本身係有港超比賽，不過港超大概1700完場，有兩個半鐘應該夠時間去到寶體！再加上呢一場波有兩位香港隊球員有機會落場，一早已經有波友問中佬上唔上？是但喇！
.
門票︰都係要用票星球個App，本來都易攪，不過新鵬城個微信本來有講開埋2樓三個section，不過到買飛揀位之時又買唔到2樓嘅位置，真係多餘！
對賽隊伍：
深圳新鵬城︰對上六輪比賽全部輸晒，由護級壓力唔大變到同降班區只有一分距離，新鵬城都可以講係自己攞嚟衰！原教練塔圖終於喺國際賽賽期中被炒，由城市集團喺歐洲調咗一位意大利藉嘅教練過嚟！
中佬覺得塔圖被少同臨場指導能力係有問題有關，尤其係經常喺場上球員抽晒筋都唔用盡換人名額，亦試過有外援效喺後備席全場睇波唔出場！除此之外，唔知係咪同決定搬到深圳時間太短，成隊波去到季都好似仲試陣，而且隊中尤其係後防有唔少「炸彈級」球員，唔係你出錯就佢出錯，除咗杜加里奇之外，全部都唔多夠中超水平，尤其係上次對青島西海岸，難得開波就領先兩球，點知一個球員發夢，就輸返三粒俾對手！另一場對山東泰山，本來有機會搶返一分，點知又有另一後防接連出錯，解圍撻Q被對手執到second ball之後輸波！
好似呢一類情況，成季都唔知出現幾多次，再加上入球量係中超包尾，唔包尾就已經好好彩！我覺得換教練係無問題，不過最後三輛先嚟換，有無效用成問題！如果問題在於球員質素，你換教練換上摩連奴、哥迪奧拿，又或者係陳X祥，可能最後結果都無分別！
.
梅州客家︰今年整體都係失望，去到尾三一輪坐咗喺尾二！本身都有中佬識嘅球員，首先當然係「港腳」茹子楠，前廣州富力守門員程月磊，前深圳佳兆業喀麥隆國腳約翰馬里！
.
上半場︰開波公佈陣容，「神鵬大俠」果然在陣，可能因為轉會窗問題，佢未跟「姑姑」去意大利！以佢身手，相信好快又再「留洋」，今日可以見到神鵬俠喺寶體獻技，中佬頓感榮幸之至！真係有今生，無來世！
除此之外，新鵬城今日個正選陣容同塔圖任教時間分別不大，後防杜加里奇，中場卡爾釆夫，前鋒利安高，艾度加西亞，再拍「當紅國腳」拜合拉木，港腳安永佳先任後備，總算係正常，不過後防1516兩件深水炸彈仍然係正選！最後連守門員都換埋，但既唔係彭鵬，亦唔係魏黽哲，唯一個換教練之下「新人事，新作風」！
一開波梅州反而係採取主動嘅一隊，唔夠兩分鐘27號已經有第一腳中龍射門，仲要杜加里奇救空門！而新鵬城上半場最有威脅嘅攻門係18分鐘，來自11號艾度加西亞頭搥，俾程月磊飛身救出！之後嘅時間，除咗梅州葉楚貴喺33分鐘有一腳中龍但無乜力嘅射門之外，上半場其餘時間雙方都無乜到肉攻勢！
.
下半場︰開波後兩隻仍然穩打穩扎，雙方主力都係中場混戰，攻勢唔多但犯規就好多，雙方都不停瞓喺地上「典來典去」，令到場波節奏慢晒！去到69分鐘，新鵬城教練團首先撳掣換出全場「隱形」嘅拜合拉木，換入安永佳。
換人之後立即有效果，71分鐘艾度左路傳中，利安高嚟一腳快射，只可惜俾今日表現相當專注嘅程月磊又再救出！再過3分鐘後，今次輪到安永佳有一次中龍射門，只可惜角度太窄，又被程月磊封位擋出底線！
雖然最後補時成8分鐘，不過兩隊基本上都係有心無力，最後長雞一吹，0:0完場，兩隊「攬炒」！
.
入場人數：可能因為涉及護級，再加上係今季唯一「廣東打比」，所以居然有7914人入場！
.
題外話︰由於今日有安永佳同茹子楠兩位港藉球員，所以都有成十幾位香港球迷上嚟捧場！只可惜由於安全考慮，安永佳只可以遠距離揮手，而茹子楠就由客軍打氣區一邊直接返更衣室。
.
總結︰呢場波打和，其他幾隊護級球隊真係笑，深圳同梅州真係「攬炒」！雖然新鵬城依家仲係排尾三，但同梅州客家距離只係一分，而且下一場對手仲要係爭緊冠軍嘅上海申花，可以攞到分機會唔大！
最後一場雖然係主場，但對手係包尾嘅南通支雲，同樣地仲有機會護級，一定搏老命！一輸波就肯定降班！
兩位港將︰安永坐落大概30分鐘左右，有一腳中龍射門，表演絕對比正選嘅拜合拉木好，起碼個波去到佢腳下唔會輕易斷纜！至於踢足全場嘅茹子楠，助攻助守之餘，可以喺呢一種比港超高強度同高硬度(佢呢場都俾人踢好多鑊！)，中佬對佢表現都無可挑剔！
至於季中租借返嚟嘅「神鵬俠」，老老實實雖然佢都尚算年青，不過已經好明顯跟唔上中超嘅節奏，今日踢足全場，唔可以話唔俾足機會佢，但係全場波除咗幾足定位死球之外，表現乏善足陳，尤其係生波推進之時，真係無腳好波！以佢今日嘅水平，唔好講「中國隊核心」，連踢中超都有啲勉強，分分鐘下一季要「屈就」中甲！中佬仲有一個疑問，如果佢返來香港踢港超，係唔係好似慈英咁當外援計？
其實中佬對今季新鵬城嘅表現係「跌眼鏡」式失望，去到季尾仲係踢成咁，但背後城市集團作為一間跨國足球企業，我唔要求一升班就攞冠軍，都唔好攪到護級咁肉酸！踢成咁，就真係唔好怪深圳球迷唔入場支持！老老實實由於所有門票都係電子票，又無晒yellow cow，令到中佬本季入場意欲大減，再加上相對高昂門票價格同唔成比例地「差」嘅products，真係倒米！
最後一場主場係11月2日星期六，中佬入唔入場？未知！以往中佬入場睇深圳護級，最後都要降班！如果我入場分分鐘連城市集團都剋死，咁就大鑊！可能從此，有足球比賽日唔可以中佬入境深圳！
[ 本帖最後由 十二月田猛臣 於 編輯 ]
| 
發表於 2006-11-8 13:09
/3 