註冊論壇會員，發現更多精彩
您需要 登錄 才可以下載或查看，沒有賬號？立即注册
×
20250501_13799604be50ee2b5211F3OU4uP4ErMu.jpg
20250501_f86c41a280abe68b091bHgqDrrHWtr9d.jpg
20250501_a629d068f639b24f24deJOZmEAozIVwI.jpg
廢話︰雖然之前對河南一場，新鵬城表現令中佬十分不滿，不過一隊波總有高低潮，之後兩場比賽新鵬城有一勝一負成績，主場擊敗另一降班熱門長春亞泰，不過作客又輸俾同級嘅梅州客家！其實對於中佬嚟講，最希望深圳主場比賽安排喺星期六，放下午施施然北上，星期日又可以休息耐啲，所以呢個星期都決定俾多次機會新鵬城！
.
門票︰今次中佬仍然維持住買最平嘅80蚊門票，不過連續兩次坐417~418呢個角都輸波，咁就要好似打麻雀咁換位(雖然中佬唔打麻雀，甚至好憎打麻雀)，今次就換去另一隻角412，希望換下位可以有分落袋！
.
對賽隊伍：
深圳新鵬城︰前一場對河南打咗一場無晒鬥志嘅比賽，之後對長春亞泰靠兩個有啲行運嘅入球攞到三分，不過之後一場又俾梅州客家炒三蛋，水準就真係......
.
大連英博︰今季新升班馬，季初幾場暫時不過不失，雖然應該要護級，但似乎比青島海牛同長春亞泰都好少少！隊中知名球員，有上一季踢申花，但踢到俾當地球迷叫佢快X啲走嘅馬萊萊，同埋把守大連大門，十多年前曾經嚟香港踢過愉園，中超「浪人」飲水哥隋維杰。
.
比賽過程︰
上半場︰正選陣容中，有香港前鋒安永佳，之前受傷嘅艾度加西亞亦都已經可以踢返，老將姜至鵬，奧地利中場薩卡里亞都係正選上場。而前鋒利安高就暫列後備！開波之後，新鵬城就開始佔主動，但就未有太大威脅嘅射門，而大連方面開波頭十分鐘直頭只縮埋喺自己後本場，完全係準備打反擊！
但講到有威脅嘅射門，反而係15分鐘之時大連一次攻擊，喺小禁區位置混戰中，個波突然「吱」高中柱彈出！真係一額汗！不過30分鐘之時，大連又殺入深圳禁區，突然間大連有一個球員表現得好誇張，成個人彈起，當然係搏十二碼！本來球証都表示無十二碼，不過依家有VAR，都唔係球証當場判決話晒事！最後球証睇完片之後，判大連得一個十二碼！大連呢個時間好似出現「爭射」狀況，最後由返11號馬萊萊操刀，結果季家葆捉錯路，大連領先0︰1！
之後時間新鵬城當然係希望反撲，雖然覺得新鵬城今日啲球員狀況，比前一場主場對河南之時好好多，甚至老將姜至鵬仍然助攻助守，但始終整合唔到一啲較有威脅嘅攻勢！而大連方面，半場領先已經算係驚喜，為咗保持半場領先亦都唔敢冒險，所以最後大連維持一球領先下完成上半場！
.
下半場︰
開波之後新鵬城都唔拖，立即組織攻勢希望盡快追平！除咗射門比上半場有威脅之外，新鵬城亦都換入後備球員入場，好似係利安高，拜合拉木同李智等等。由於大連似乎一心想一球分勝負執走三分，所以基本上都係死守！呢個態度就益晒新鵬城，尤其係一向出名「攻強守弱」嘅李智，大連既然唔攻，李智就表現得更加活躍，不停助攻！
大連下半場只係得一次機會，74分鐘之時7號中路突破，單刀射入！正當現場球迷以為又輸一場之下，旁証舉旗表示越位！經VAR核實係越位，大連無功而還，新鵬城大難不死！
去到83分鐘之時，新鵬城一輪壓住大連嚟打之後，終於由一個角球追平！薩卡里亞開角球，當大連集中防犯杜加里奇、利安高同拜合拉木幾件高佬之時，唔為意薩卡里亞開個地波出禁區頂，卡爾釆夫抽一腳地波，中途好似省到人改變方向，飲水哥欲救無從！新鵬城幾經辛苦之下，終於追平！
最後補時7分鐘，雖然新鵬城好想贏，而大連亦都無乜力去贏，不過最後球証長笛一吹，以1:1完場，各執返1分！
.
入場人數︰23633人，呢個應該係今季新鵬城嘅基本盤！
.
全場最佳球員︰卡爾釆夫。
.
總結︰呢一場波，雙方各自有機會，但只係把握到入一球，所以基本上打和都算係合理！對方新鵬城嚟講，今場睇咗執返一分之外，表現比前一場對河南有返相當起色，唔會係一碰就跌，一傳就失好好多。
不過始終對住同級隊伍主場打和都唔係好事，希望艾度加西亞傷勢可以復員，而利安高亦都可以打破入球荒！
.
賽後小事件1︰中佬搭地鐵趕返福田口岸時，車廂內遇到大連球迷，大家都 吹下水，最後落車前仲合照......
.
賽後小事件2︰當中佬買完嘢返到福田口岸過關，去到落馬州等B1返出元朗，天橋上又出現人潮管制，當大部份人都靜靜等之時，有幾位貌似「長者」嘅男女，排隊等候之時瓜瓜咁嘈，又話多人又話唔知等幾耐......中佬本來呢幾日都病病地，去到呢個鐘數都謝晒，但都忍唔住對住空氣大叫︰唓！呢度個個星期六呢個鐘數都係咁安排，有咩好大驚小怪！
.
賽後小事件3︰為咗慳錢就搭巴士返出西九龍，太子落車，正當準備回家之時，中佬俾一名操普通話的年輕女子叫停，當時已經過咗十二點，呢個鐘數一個年輕女子喺太子站附近好大機會係迷路，中佬自然想盡力幫佢！點知佢開口並唔係迷路，竟然又係問中佬可唔可以請佢食啲嘢！！！你XX！又當中佬係傻仔，又想R我請食嘢？於是中佬立即駛出練習多年，華麗地施展「拖舟轉身」走去對面馬路！一路行中佬心入面媽聲四起，又係什麼「小黑書」教人落嚟香港隨街搵「老襯」請飲請食？依家過咗十二點，街上行人唔多，妳真認為香港治安好好，單身一個後生女隨街搵「獵物」都係十分安全？定係當香港男人都係傻仔，半夜三更大把老襯隨街請飲請食！！！？？？記住︰面係人哋俾，賈係自己掉！
[ 本帖最後由 十二月田猛臣 於 2025-5-1 01:10 編輯 ] | 
發表於 2006-11-5 20:07
/3 