註冊論壇會員，發現更多精彩
您需要 登錄 才可以下載或查看，沒有賬號？立即注册
×
20250831_27ec3ffee178cc2b37f890CzmfirwX5F.jpg
20250831_181cedc53a6c854af7f44A02BwC2VrNc.jpg
廢話︰新鵬城今季同上年除咗主場近關口好多之外，就係安排咗好多場比賽喺星期六踢。對於中佬嚟講，星期六比賽比星期日方便，中午收工之後北上，食埋嘢就入場。不知不覺又嚟下半季中段，之後再無星期六晚間比賽，所以即使啱啱由日本返嚟，辛苦啲都仍然北上。
.
門票︰今場仍係買80蚊飛，不過遲咗買，412區賣晒，改去411區！
.
對賽隊伍：
深圳新鵬城︰換咗新教練之後第一場頭威要勢炒青島海牛四蛋，之後又連場不勝！最離譜係上一場主場輸俾浙江，最後十五分鐘，換人同佈防都得啖笑。
.
山東泰山︰「前」豪門球隊，今季變成中游，韓國主教練收咗，換咗本地教練。今季當然唔會降班，但亦都肯定同錦標無緣！最出名球員係王大雷，不過今場停賽！
.
比賽過程︰
上半場︰雙方出場陣容，首先一個字：驚！新鵬城仍然由李智踼正選，姜至鵬後備都無！艾度加西亞復出，但唔見咗卡爾采夫！雖然韋斯利同利安高在陣，不過咁嘅陣真係凶多吉少！可能之前試咗季家葆同趙石都唔理想，今場罕有地出彭鵬打正選，雪咗咁耐，都唔知狀況如何？
山東都唔講得少，港腳李小恒正選踢9號位！
開波後大家都係賊佬試沙煲，山東今年都多問題，唔再係幾年前豪門球隊，但新鵬城就仲衰，開波之後雖然節奏都唔係快，但成班球員好似有啲心不在焉，俾個波都甩甩漏漏，唔係俾對手截到就直頭傳埋出界，仲發生咗幾次回傳力度，唔夠差啲送個單刀波俾山東！最吹漲仲係連杜加里加踢起上來都有啲夢遊球場！
新鵬城發夢，山東就唔同你客氣，11分鐘，國腳謝文能起腳射門，彭鵬已經撲到但個波太勁，撲唔出底線仲彈柱入返小禁區，港腳李小恆就唔客氣執隻雞，射入佢中超第一球！唔知今日李小恆有無家屬上嚟睇佢演出？
22分鐘山東又把握新鵬城後防漏洞，謝文能又「放題」李智，底線傳中，山東10號接應輕鬆頂入成0:2！呢球波，好明顯新鵬城中路只要引開杜加里奇，其實三幾個後衛頂波都多數輸！而且近兩場中佬覺得杜加里奇補位好似慢咗！
新鵬城上半場差不多去到補時階段，先至先後由艾度加西亞同韋斯利有兩次比較有威脅嘅射門，混混下又完半場。
.
下半場︰
一開波就換入利安高，新鵬城希望用多個前鋒去衝山東後防！而整體嚟講，下半場出嚟之後，新鵬城表現明顯好咗！不過去到54分鐘，就到呢場波一個關鍵點，一次邊線爭波之下，球証睇埋VAR之下，話艾度加西亞蓄意去踩對手，紅牌！唉！呢個時間打少一個，真係雪上加霜！
不過世事有時好奇，跟住落嚟時間，打多個嘅山東竟然全面退守，打少個嘅新鵬城竟然撳住嚟打！去到63分鐘，利安高射門，山東後備守門員撲到都入，之後先知原來係「痾蛋」！
追返一球，新鵬城再次燃點返搶分希望，不過山東雖然比早幾季差咗好多，但整體嚟講不論係華人球員定係外援經驗都比較好，由於新鵬城打少一個，加上去到下半場中段，都唔敢夾硬上去搶，而山東就利用呢個優勢去猜，直頭可以猜四、五分鐘，新鵬城完全無機會控球！
跟住落嚟嘅時間，雙方都有一啲射門，其中今人復任正選嘅彭鵬都有撲救！當大家諗住山東可以拖到完場之際，突然又出沖。山東後備守門員接波之後拖時間(正常)，之後起身帶住個波，當利安高埋去之時，佢又執返起個波！喂！重觸球喎！小學生先犯嘅錯誤！球証判間接自由球，佢仲同球証拗......深圳近門有間接自由球，不過人馬疊疊，呢啲波好難入！果然韋斯利撥橫俾利安高狂抽，省中山東後防只搏得角球！
去到補時階段，場波終於再無翻盤機會，山東左路出波，張衛居然由得個波漏去尾柱，俾山東6號輕鬆射入！輸到1:3，咁呢一場波就肯定輸梗，中圈再開波之後，球証好快都吹雞完場。
.
總結︰其實呢一場又係另一場典型新鵬城輸波嘅比賽，特定時段突然全部發瘟，落後兩球之後先開發瞓醒，到隊波操控返個形勢之時，突然間又無厘頭整個紅牌打少個......作為球迷真係唔識講！
山東泰山都係垃垃圾圾，上半場領先兩球，之後俾新鵬城撳住嚟打，十個打十一個都俾人追返一球！如果唔係艾度加西亞唔小心紅牌，場波鹿死註手都仲有未知之素！
計埋之後一場作客輸埋俾長春亞泰，新鵬城又已經連輸五場！同舊年一樣，原來唔係咁差嘅形勢，一個月又跌返落去水深火熱！其實新鵬城嘅外援水平唔差，但係華人球員水平唔夠亦係事實，好似姜至鵬，水平係夠，但年紀大，捱唔足三十場波，尤其係夏天炎熱時！近幾場波無咗姜至鵬，後防真係亂晒大龍！
至於今年會唔會有機會降班，就要對同級球隊嘅結果，好似係梅州、青春島！可能當最後水深火熱之時，又去打劫申花！不過踢成咁，真係無眼睇，護到級，都係肉肉酸酸嗰隻！ | 
發表於 2006-11-3 20:47
/3 